Permun Mōzei knīgs 1:1

1¹Pradomatei Deiwas redzėk dāngan be zemmin.

²Be zemis buovei bi issvēdza be pūsta, be mikrenibbo kirs twilomi. Be dvusja Deivi nūztun kirs ūdzjatas.

³Be Deiwas suogėk: Tei virs swaigas, be swaigas boje.

⁴Be Deiwas mačėk ko swaigin buovei gėron; be Deiwas atsavakį strap swaigas be strap mikrenibbo.

⁵Be Deiwas bilōcėk swaigin “diņi”, be mikrenibbo bilōcėk “naktis”. Buovei wekera be buovei rūsa, anas diņi.

⁶Be Deiwas suogėk: Tei virs kjąurs wikuje ūdzei, be tei virs atsavakajs strap ūdz po ūdzei.

⁷Be Deiwas durėk kjąuron be atsavakomās strap ūdzon ko sem kjąuron be ūdzon ko kirs kjąurei, kāp buovei takja.

⁸Be Deiwas bilōcėk kjąuron dānga. Be buovei wekera be buovei rūsa, wustran diņi.

⁹Be Deiwas suogėk, bōcej atsavakosams ūdz sem dāngan po anan pāikan, be bōti mačiojomās sawon saveiskin, be buovei takja.

¹⁰Be Deiwas bilōcėk sawon saveiskin “zemis” be ūdztilkuonu bilōcėk “jąurai”. Be Deiwas mačėk tas gėrsa.

¹¹Be Deiwas suogėk, leicetej zemmei ebzuolint sū sejuotė zuolens trēivi be waisjun meidans, redzuotė vįsēten sukun waisjins, kėno sėklos įr juswis, lei tei bōcu už zemjun, be buovei takja.

¹²Be zemis issąugjį sejuotė zuolens trēivi vįsēten sukun be meddos redzuotė vįsēten sukun waisjins kėno sėklos įr juswis, be Deiwas mačėk tas gėrsa.

¹³Be buovei wekera be buovei rūsa, tertan diņi.

¹⁴Be Deiwas suogėk, teibōcu swaigji kjąuraje dāngun, jakeiti strap diņi be strap naktis. Leicu įr sentlitas be likjatas, dēinemis be kadjatas.

¹⁵Be lei stai įr swaigitas kjąuraje dāngun, kas dzuorie kirs zemmi. Be buovei takja.

¹⁶Be Deiwas redzėk duwun milzīwingon swigins; milzīvaigįgais swigas valdzie kirs diņasos, smaigįgais swigas valdzie kirs nakti, be redzėk swaissnon.

¹⁷Be Deiwas nuostōdį kjąuraje dzuoŗu kirs zemmi,

¹⁸be valdzeiti kirs diņasos be kirs nakti, be jakeiti strap swaigin be strap mikrenibbo, be Deiwas mačėk tas gėron.

¹⁹Be buovei wekera be buovei rūsa, kweris diņi.

²⁰Be Deiwas suogėk, lei pēiskejį ūdzi sū giwanon redzajon pēikinibbins, be lei puwōgjai ļuksie kirs zemmi pār kjąuron dāngai.

²¹Takja Deiwas redzėk milzīwingon jąurgiwins, be wise giwinai redzajs, kas kussai, sū kurio pēiskeėk ūdzi prēiguol tąn sukammas, be wisens suornins prēiguol tąn sukas, be Deiwas mačėk tas gėrsa.

²²Be Deiwas jie swincėk, sočikai; waišejokiecetise be daugjekiecetise, prēičimsetej ūdzons jąurejei, be puwōgjai už zemmi.

²³Be buovei wekera be buovei rūsa, penkis diņi.

²⁴Be Deiwas suogėk, lei zemis issdwōdie giwanon redzajon prēiguol tąn sukammas, pekai be rōpuotė dekkins, be swirens zemmi prēiguol tąn sukammas. Be buovei takja.

²⁵Be Deiwas redzėk swirens zemmi prēiguol tąn sukammas, be pekai prēiguol tąn sukammas, be wiss rōpuotė už zemmi prēiguol tąn sukammas, be mačėk gėrsa.

²⁶Be Deiwas suogėk, redzetej zmainin prēiguol nussun pasedzen, prēiguol nussun papēikon, be valdzie kirs zuwi viš jąuroje be kirs puwōgei viš oroje be kirs paka be viš wisaje zemoje be viš wisaje rōpuotė dekkijte rōpuotė už zemmi.

²⁷Takja Deiwas redzėk zmainin Siwis pasedzen, pasedzen Deivi Jo tam redzėk, verīnikin be gėnāniken Jo jie redzėk.

²⁸Be Deiwas jie swincėk be Deiwas jowan suogėk: Waišejokiecetise be daugjekiecetise be prēičimsetej zemmin be jitsi užvaldzetej be tuwetej valdībin kirs zuwi viš jąuroje be kirs puwōgei viš oroje, be kirs wise giwinai redzajs, kas kussai, kirs zemmi.

²⁹Be Deiwas suogėk, štin duodzun juosa wiss trēiwins kuri audwōjomās sėtlin už wisąn zemmi wīrsuvi, be erans meida, kas įr tajei, waisjai meidas audwōjuotė sėtli juosa, bōcie mąustuo.

³⁰Be wissem swirum viš zemmi, be wissem puwoggi viš oroje, be wissem rōpuotė už zemmi kurijis įr giwinibbain duose, asmū dwōjomas wissin žaļons trēiwins mąustitas. Be buovei takja.

³¹Be buovei wekera be buovei rūsa, ussas diņi.